Nga: Paul LeBlanc & Zachary B.Wolf “CNN”
Nenet që fajësojnë presidentin amerikan Donald Trump për shpërdorim detyre, pritet të votohen në Kongres para fundit të kësaj jave, më pak se tre muaj pasi kryetarja e Kongresit, Nensi Pelozi, shpalli nisjen e hetimit mbi impeachment-in ndaj shefit të Shtëpisë së Bardhë. Ja se si mund të rrjedhin gjërat:
Votimi në Kongres
Dy nene të fajësimit, do të hidhen në votë në Kongres. Nëse me shumicë të thjeshtë, Kongresi miraton secilin nga nenet, Trump do të bëhej presidenti i tretë në historinë e SHBA-në që fajësohet. Presidenti Riçard Nikson, dha dikur dorëheqjen pasi Kongresi votoi pro impeachment-it, por para se të mund të dilte para Senatit. Kongresi nuk ka caktuar ende një datë specifike për votimin, por 2 kongresmenë demokratë thanë se kjo mund të ndodhë këtë të mërkurë.
Çfarë përmbajnë dy nenet?
Neni i parë i impeachment-it, e akuzon Trump për abuzim me detyrën e tij, në rastin kur ushtroi presion ndaj Ukrainës për të hetuar rivalët e tij politikë, duke e shantazhuar Kievin me pezullimin e ndihmën ushtarake amerikane. Neni i dytë e akuzon atë për pengimin e hetimit mbi sjelljen e tij të gabuar, nëpërmjet pengimit të dëshmitarëve për të dhënë dëshminë e tyre.
Humbja e gjyqit në Senat
Nëse nenet miratohen nga Kongresi sikurse edhe pritet, Senati i udhëhequr nga republikanët do të zhvillojë një gjykim të tijin, dhe procesi do drejtohet nga Kryetari i Gjykatës së Lartë Xhon Roberts, një i emëruar nga Xhorxh Bush, dhe që deri tani ka luajtur një rol kyç.
Udhëheqësi demokratëve në Senat, Çak Shumer, e bëri të qartë përmes një letre drejtuar kreut të shumicës republikan në senat, Miç Mekonell të dielën në mbrëmje, se preferon që gjykimi në Senat të shoqërohet me dëshminë e dëshmitarëve, dhe publikimin e fakteve të reja.
Kjo është kundërshtuar menjëherë nga republikanët, që mendojnë se një gjykim më i shkurtër i presidentit dhe pa dëshmitarë, do të shmange shndërrimin e Senatit në një cirk politik. Shumer kërkoi thirrjen në një dëgjesë në Senat të të paktën 4 dëshmitarëve: shefit të kabinetit të Shtëpisë së Bardhë Mik Malvanej, ish-këshilltarit të sigurisë kombëtare Xhon Bolton, këshilltarit ushtarak të Shtëpisë së Bardhë Robert Bler, dhe kreut të Zyrës së Menaxhimit dhe Buxhetit, Majkëll Dafej.
Ndërkohë Shtëpia e Bardhë, po merret ende me planifikimin e strategjisë së saj mbrojtëse gjatë gjyqit në Senat, dhe po diskuton nëse do të thërrasë apo jo dëshmitarë, të cilët mund ta zgjasin gjyqin. Trump u shpreh të dielën e shkuar, në favor të një procesi të shkurtër gjyqësor.
Çfarë thonë sondazhet
Një sondazh i ri nga televizioni “Fox News”, zbuloi se 50 për qind e votuesve në mbarë
vendin, dëshirojnë që Trump të fajësohet dhe shkarkohet nga detyra. Kjo është një normë e pandryshuar, që prej një sondazhi të ngjashëm në fund të tetorit.
Ndërkohë 4 për qind e të anketuarve, mendojnë që presidenti Trump duhet të fajësohet, por jo të shkarkohet, në një kohë që 41 për qind e të pyeturve e kundërshtojnë plotësisht fajësimin. CNN ka ndërmarrë vetë një sondazh mbi këtë çështje, dhe të dhënat janë si më poshtë:
Pavarësisht nga pikëpamjet e tyre për fajësimin, 53 për qind e votuesve thonë se Trump po abuzon me pushtetin që ka, 48 për qind mendojnë se ai e ka penguar Kongresin në kryerjen e detyrës së tij, dhe 45 për qind mendojnë se ai ka marrë ose dhënë ryshfet.
Ndërkaq, 60 për qind e të anketuarve, mendojnë se në përgjithësi është e gabuar që Donald Trump t’u kërkojë liderëve të vendeve të huaja, të hetojnë rivalët e tij politikë. Ndërkohë qytetarët amerikanë, janë të ndarë mbi çështjen nëse demokratët në Kongres po e zhvillojnë me korrektësi procesin e impeachment-it. 45 për qind thonë po, 42 për qind jo.
Ndërkohë vlerësimi i figurës së Trump, është 45 për qind pozitiv dhe 53 për qind negativ, pra me një përmirësim i vogël, nga 42 për qind vlerësim pozitiv në tetor, dhe 57 për qind mendime negative./TIRANA TODAY
