Ish-deputetja e PD-së, Albana Vokshi, ka publikuar një video në Facebook, ku duket kryeministri Rama duke biseduar me një grua.
Gruaja shihet të jetë e revoltuar teksa ankohet tek kryeministri për gjendjen në të cilën ndodhet. Mirëpo në një moment gjatë diskutimit, Rama e pyet atë nëse është e martuar edhe ajo përgjigjet që jo.
Rama: E martuar je?
Banorja: Jo.
Rama: Eeee pra. E di pse? Se kush të afrohet trembet, se i tmerron.
Banorja: Jo, jo, nuk tremben
Rama: Je dinamit, dinamit…
Banorja: Jam dinamit se jam zot shtëpie ka 40 vjet, që 5-vjece. More vesh?
Kjo si duket ka shkaktuar edhe reagimin e ish-deputetes, e cila shprehet se Rama sikur është pro barazisë gjinore, por ai në të vërtetë nervozohet nga kryefamiljaret e vuajtura.
Postimi i plotë:
Edi Rama dëshmoi edhe një herë që është hipokriti numër 1 në fushatën e tij të gënjeshtërt për Barazinë Gjinore, të cilën e propagandonte me këmbët mbi tavolinë, në nisje të ceremonisë për Presidencën e OSBE, zhvilluar në Sllovaki.
Këto ditë të zymta e të trishta për të gjithë, ditë që përkojnë me 16 ditët ndërkombëtare të aktivizmit të luftës kundër dhunës ndaj grave, Edi Rama ngado që ka shkuar ka fyer e dhunuar verbalisht, në mënyrë të pashembullt gra e fëmijë.
Përgjegjësi dhe shkaktari kryesor i situatës së mjeruar, që rëndon edhe më shumë mbi gratë e nënat, me gjuhë tallëse, diskriminuese, përçmuese, urrejtje e raciste, fyen e dhunon psikologjikisht çdo grua, e cila guxon të kërkojë llogari apo të kërkojë atë çfarë me ligj i takon. Sot, dua të përsëris thirrjen time për gratë e vajzat: Bëni kujdes nga Edi Rama!
Ai i do gratë të veshura shtrenjtë e mirë, për t’i rreshtuar ushtarakisht si dekor për propagandën. Atë e bezdisin, e nervozojnë gratë me veshje të thjeshta, punëtoret pa fjalë, kryefamiljaret e munduara, të cilat punojnë tërë jetën e tyre për t’ju siguruar fëmijëve një copë bukë. Atij i vrasin sytë, gratë e dinjitetshme, të cilat i kujtojnë atij se propaganda ka përkeqësuar qeverisjen dhe rrjedhojë e saj është rritja e varfërisë së skajshme e sot, menaxhimi pas tërmetit shkatërrimtar të 26 nëntorit.
Mos i besoni! Çdo dalje e tij në televizione gjatë shëtitjeve në pasojat e post-tërmetit, është vetëm propagandë për të fshehur abuzimet e tij me pushtetin, që kanë shkatërruar çdo qelizë të institucioneve dhe kanë persekutuar e detyruar profesionistët të heshtin e disa prej tyre të largohen duke lënë Shqipërinë pa ekspertizë në sektorët strategjikë.
Refuzojeni Edi Ramën, sepse qëndrimi i tij në krye të qeverisë, çdo ditë sjell papunësi më të lartë, varfëri më të thellë dhe përkeqësim të të drejtave të njeriut e statusit të grave dhe vajzave në Shqipëri. Aktivizimi kundër dhunës ndaj grave të nisë me refuzimin e Edi Ramës!
