Kryeministri Edi Rama në mbledhjen e sotme theksoi se pasi të mbyllet procesi për shembjen e banesave të dëmtuara nga tërmeti do të nisë puna për ndërtimin e lagjeve të reja në zonat e prekura.
Po ashtu, ai vuri theksin mes të tjerash tek një problem që lidhet me mungesën e fuqisë punëtore. Ndërsa shtoi se do të çohet në Kuvend ligji për të mundësuar marrjen e fuqisë punëtore edhe nga jashtë.
“Kemi një problem ne fuqinë punëtore, duhet te bëjmë lehtësimin ligjit për marrjen e fuqisë punëtore edhe nga jashtë, ta çojmë në Kuvend dhe ta mbyllim, ne 19 dhjetor duhet te jete ne Kuvend”, tha Rama.
Ndër të tjera, kryeministri tha se do të ketë para në dorë për ata banorë në fshat që duan t’i rindërtojnë vetë banesat e tyre.
“Te bëjmë gati planin për shtëpitë individuale, për pallatet 100% është barra e qeverisë dhe kompanitë të mëdha, për ato individuale duhet bërë harta e veprimit që të ndajmë me organizatat solidare, që tu japim hartën zonën, numrin që procesi të nisë.
Familje në fshat që duan të rindërtojnë vetë shtëpitë tu japim financim, faktikisht me një financim në 20 mln lekë të vjetra mesatarisht ata janë gati që ta bëjnë vetë se fitojnë kohë dhe nuk presin që të vijë dikush, por kuptohet me supervizionim që të garantojë gjithë parametrat”, tha Rama.
