Ndonëse ka kaluar më shumë se 24 orë nga tërmeti i rëndë që goditi vendin, ka ende shpresë për të gjetur persona të gjallë nën gërmadha. Njëri prej zjarrfikësve italianë të përfshirë në operacionin e kërkim-shpëtimit në Durrës, ka deklaruar për “A2”, se po punohet me objektivin për të shpëtuar ende njerëz në banesën e familjes Lala.
Aktualisht, zjarrfikësve shqiptarë u janë shtuar edhe 160 zjarrfikës italianë. Këta të fundit janë të specializuar në kërkimin poshtë rrënojave.
“Jemi 160 zjarrfikës italianë, të specializuar në kërkimin poshtë rrënojave. Do të vijnë edhe të tjerë. Ka ende kohë, në L’Aquila kemi shpëtuar njerëz që kishin 72 orë nën rrënoja.
Gjithmonë punojmë me objektivin për të shpëtuar njerëz”, deklaroi zjarrfikësi italian.
Sipas tij, operacioni është i vështirë, pasi “shtëpia është shembur e gjitha, dhe të katër katet kanë përfunduar sipër njëri-tjetrit”.
“Duhet pasur shumë kujdes kur gërmon nga njëri kat në tjetrin, për të mos dëmtuar njerëzit që janë bllokuar poshtë”, ka thënë ai.
