Shqiptarët dje u zgjuan nga lëkundjet e tërmetit që shkundën kryesisht Durrësin, por edhe Tiranën. Deri më tani janë shënuar 27 viktima, mes tyre tre fëmijë.
Ndërkohë raportohet për më shumë se 600 të plagosur.
Dëmet në banesa janë të mëdha. Vendi vijon të lëkundet vazhdimisht, ndërsa të gjithë i druhen faktit nëse do të ketë sërish një tërmet tjetër.
“Dritare.net” intervistoi profesorin në sizmologji, Ish-drejtor i Institutit të Sizmologjisë, Shyqyri Aliajn.
Tërmeti i sotëm 26 Nëntor 2016 ora lokale 03:54:11.3 me M=6.3 shkalla Rihter dhe epiqendër në detin Adriatik, 34 km ne VP të Tiranës, në Gjirin e Rodonit. Si konsiderohet ky tërmet krahasuar me të tjerë të rajonit, shkatërrimtar apo i pritshëm?
Sh. A- Tërmeti i 26 Nëntorit 2019 me magnitudë 6.3 Rihter është një tërmet i pritshëm për vendin tonë, dhe më gjerë për rajonin Ballkanik.
Për këtë rast mund të përmendim tërmetin e Durrësit të 17 dhjetorit 1926 me magnitudë 6.2 Rihter dhe intensitet epiqendror 9 ballë Merkali apo tërmetin e Shkodrës të 1 qershorit 1905 me magnitudë 6.6 Rihter dhe intensitet epiqendror 9 ballë Merkali.
Shkatërrues konsiderohen tërmetet me intensitet epiqendror 10 ballë Merkali.
Përpara goditjes me magnitudë 6.3 Rihter pati një paragoditje me magnitudë 4.3 Rihter. Mos vallë tërmeti me magnitudë 6.3 Rihter është një paralajmërues i një goditje më të fortë?
Goditja kryesore e 26 Nëntorit 2019 me magnitudë 6.3 Rihter u parapri me tre paragoditje, më e forta në orën 02:47 ora lokale me magnitudë 4. 4. Pasgoditjet nuk arrijnë të tejkalojnë energjinë e goditjes kryesore, pra magnitudën.
Në çfarë brezi sizmik bën pjesë Shqipëria dhe cilat janë rajonet më të rrezikuara të vendit tonë?
Shqipëria bën pjesë në brezin sizmik Mesdhetar-Tranaziatik.
Në Shqipëri janë përcaktuar këta breza tërmetesh:
1) Brezi tërmetor Joniko-Adriatik që ndjek zonën tokësore bregdetare nga JL në VP.
2) Brezi tërmetor Korçë-Peshkopi që ndiqet nga Erseka në Korçë e deri Dibër me shtrirje V-J. dh
3) Brezi tërthor Lushnjë-Elbasan-Dibër me shtrirje VL.
Ndër ta më i rrezikuari është brezi i parë, Joniko-Adriatik.
