Kreu i parlamentit, Gramoz Ruçi, ka folur në lidhje me rritjen e sigurisë me qëllim garantimin e stabilitetit në të gjithë vendet e Ballkanit Perëndimor.
Ai foli në lidhje me këtë në takimin vjetor të komisioneve parlamentare të sigurisë dhe mbrojtjes së Evropës Juglindore, që po mbahet në Tiranë. Gjatë fjalës së tij, Ruçi tha se nuk mund të ketë Evropë të bashkuar dhe të sigurt, pa integrimin e Ballkanit Perëndimor në familjen e madhe të BE-së.
“Qeverisja e sigurisë është një çështja jo fort e lehtë në Evropën juglindore, kjo për disa arsye. Kërcënimet transacionale, terrorizimi, armët e shkatërrimit në masë po bashkëjetojnë në rajonin tonë. Për arsyes që i dimë të gjithë, rajoni duke qenë njësoj i rrezikuar ka rrezik nga sulmi kibernetik.
Kapacitete mbrojtëse kushtëzohen nga kapacitet më të vogla teknologjike dhe kompjuterike. Pjesa tjetër e kontinentit ka ushqyer disa steriotipe për Ballkanin Perëndimor. Kjo është një sfidë për stabilitetin.
Ballkani perëndimor nuk është rajon, fqinj i Evropës, por është pjesë integrale e Evropës. Nuk ka nevojë të shpikim projekte artificiale, por duhet të ndërgjegjësohemi se vendi i Ballkanit Perëndimor është vetëm një, Bashkimi Evropian.
Me Ballkanin jashtë BE, Evropa është më e pasigurt. Politikat e sigurisë dhe të mbrojtjes për ne dhe për rajonin e Evropës juglindore lidhen ngushtë me Evropën dhe integrimin e Ballkanit Perëndimor”, deklaroi ai.
