Pas denoncimit të deputetes Rudina Hajdari, se e kishin kërcënuar në zyrën e saj, një tjetër reagim është përcjellë nga kreu i grupit demokrat, Korab Lita. Teksa është pyetur nga gazetarët nëse qëndronte pas kërcënimeve të Hajdarit, e cila i bëri publike sot në foltoren e Kuvendit, Lita ka hedhur poshtë këto zëra.
Ai madje zbuloi ndër të tjera se marrëdhëniet me të i ka korrekte, dhe se ata takohen dhe në zyrë. Këtë situatë ai e justifikoi me faktin se gjërat marrin një tjetër rrjedhë, në gjaknxehtësi e sipër.
“Jam deputet si znj. Hajdari. Nuk përgjigjem për sigurinë në Kuvend. Jo se kam kërcënuar, e kam kolege. Me znj. Hajdari shkojmë dhe takohemi në zyrë. Në gjaknxehtësi e sipër thuhen këto gjëra, por ne jemi koleg. Nëse kam terren për kërcënim, mund të kërcënohem dhe unë”, pohoi ai.
Po kështu, Korab Lita shtoi se ai ka takuar para dy ditësh Rudina Hajdarin, dhe se mes të dyve nuk ka patur aspak një situatë të tensionuar.
“Jemi takuar para dy ditësh, ditën e mbledhjes dhe nuk kemi debatuar. Nuk kam informacion se znj. Hajdari është kërcënuar. Nëse ka terren për kërcënim, edhe unë jam deputet, mund të kërcënohem edhe unë”, tha ai.
