Pas dështimit të negociatave me Bashkimin Evropian, kryeministri Edi Rama deklaroi gjatë një konference për mediat se procesi u bllokua për shkak të politikave të brendshme të BE-së. Sipas tij, përgjegjësia është e bllokut të BE-së, ndërsa shtoi se Shqipëria do të vazhdojë reformat e nisura.
Ndër të tjera, shefi i qeverisë u shpreh se ka marrë shumë mesazhe telefonike nga kryeministrat e Partive Socialiste Europiane, me të cilët u takua ditën e djeshme.
“Janë bërë përpjekjet maksimale për të arritur të marrim atë që na takon. Këtë nuk e them unë, tanimë e ka thënë jo vetëm me shkrim KE por e dëgjuam të thuhet nga vetë kancelaria e Gjermanisë.
Nga ana tjetër do u them se kam marrë shumë mesazhe nga një pjesë e kryeministrave në takim. Komunikova edhe me presidentin e Francës. Nëse duam të shikojmë drejt në sy të vërtetën është ajo që kam thënë prej disa kohësh, parë në të gjitha diskutimet se procesi po shkonte në përplasje drejt Francës e Gjermanisë. Franca nuk pranon të vazhdohet me të njëjtin proces. Kërkon një transformim të vetë procesit të integrimit, madje deri në pikën që të arrihet në një tjetër objektiv për horizontin e integrimit. Presidenti i Francës kërkoi ndryshim në procesin e zgjerimit”, tha Rama.
Po ashtu, Rama shpjegoi se çdokush që mendon se negociatat nuk u hapën për shkak të qeverisë shqiptare, e ka gabim.
“Liderët e BE kanë qenë pro hapjes të negociatave të BE. Ajo që ka ndodhur është rezultat i mosarritjes së konsensusit mes vendeve anëtare për arsyet e tyre. Është e tepërt që i shtohen bishta kësaj që është thelbësore, jo azilantët, jo po ajo.
Në këtë situatë, kushdo vend të kishte qenë, e të priste konsensus, nuk do e kishte marrë atë konsensus, sepse tema është spostuar diku gjetkë. Rruga jonë vazhdon të jetë e njëjta, pa asnjë dyshim”, deklaroi Rama.
