Pas takimit me kryeministrin Rama, kryeministri italian Giuseppe Conte u prit edhe nga presidenti Meta në zyrën e tij.
Meta vlerësoi partneritetin strategjik me Italinë dhe falenderoi për mbështetjen e vazhdueshme që i ka dhënë Shqipërisë ndër vite, në proceset e integrimit euro-atlantik të vendit.
“Ndjekim me shumë vëmendje të gjithë debatin mbi vendimin që do të merret në Samitin e 17-18 tetorit për Shqipërinë dhe Maqedoninë e Veriut. Shpresojmë që qasja realiste e çeljes në parim të negociatave, për Shqipërinë dhe Maqedoninë e Veriut, të mbështetet nga të gjitha vendet anëtare”, tha Meta.
Sipas presidentit, Italia mbetet një nga partnerët kryesorë tregtarë të Shqipërisë.
“Gjithsesi, ne konsiderojmë që ka ende shumë mundësi për t’u përdorur në intensifikimin e mëtejshëm të bashkëpunimit ekonomik dhe shkëmbimeve tregtare. Në veçanti, presim një prani më të madhe të investitorëve italianë në Shqipëri. Një urë e fuqishme bashkëpunimi ndërmjet vendeve tona, janë edhe komuniteti arbëresh dhe emigracioni shqiptar në Itali”, deklaroi ai.
Presidenti Meta inkurajoi që të rrisim bashkarisht përpjekjet për mbajtjen gjallë të gjuhës, kulturës e traditave të pasura shqiptare në vendin fqinj.
