Pas disa aludimeve se gazetari dhe analisti Artur Zheji është sëmurë, vjen edhe një reagim nga vetë ai, duke qetësuar të gjithë dashamirësit. Jo vetëm që nuk është sëmurë, por pushimet po i shkojnë mësë miri. Ai po pushon në Sarandë me familjen e tij. Pas ndërhyrjes kirurgjikale në Gjermani, Zheji ka zgjedhur që të pushojë, para se të nisë sezoni i ri televiziv.
Zheji, më në fund si jeni?
Do të doja që shumica e miqve të mi, që ua dua të mirën, të mos ndalojë së notuari në det, ashtu si po bëj unë në mënyrë të përditshme. Pse çfarë ka ndodhur?
Thuhet në disa portale se vijoni të jeni sëmurë…
Më duhet ti përgënjeshtroj. Ndoshta, ndokush ka dëshirë të jetë ashtu dhe dëshirat i shndërron në përfundime, zakon shqiptar jo i shëndetshëm ky. E vërteta është se, këto dy tre muajt e fundit, u kujdesa për shëndetin, më me vëmëndje se më parë, pasi bëra një ndërhyrje kirurgjikale të lehtë dhe të shpejtë, në Gjermaninë e bekuar nga Zoti.
Porse fill pas kësaj, kam parapëlqyer të heq “prizat”, nga e përditshmja mediatike dhe politike shqiptare, për të ulur stresin dhe kotësinë e rënies në kurthin e lajmeve të verës, që shpesh janë të ngjashme me puçrrat që u dalin fëmijëve nga djersa e vapës. Është një jetë e re në trekëndëshin, diell, det dhe familje… Pastaj mungesat në Shqipëri, ndonjëherë të bëjnë më të vlerësuar se sa prania mediatike e përhershme. Është edhe kjo diçka për tu shijuar, kur mungon ca kohë, dallohet më lehtë kush të vlerëson e kush jo, ku vendin e parë e ka publiku që ka mbërritur te unë me shqetësim dhe dashuri befasuese”, thuhet ndër të tjera në një pjesë interviste që është publikuar nga “360grade.al”.
