Kryetari i PD-së Lulzim Basha përgjatë një deklarate mediatike, i revoltuar, theksoi se votimi i ditës së djeshme nuk e zgjidhi krizën politike në vend, por e thelloi më shumë atë.
Basha riktheksoi sërish se Rama duhet të largohet dhe se politikanët duhet që të mbajnë përgjegjësi për veprimet e tyre.
“85% e shqiptarëve duan ndryshim që është e vetmja vlerë e asaj që ndodhi dje. Votimi i djeshëm nuk e zgjidhi, por e thelloi krizën se dje u rikonfirmua se shkaktari i saj është Edi Rama. Detyra jonë vazhdon edhe më e fortë, edhe më e vendosur. Rama duhet të largohet. Ai nuk mund të jetë më pjesë e asnjë hapi drejt së ardhmes.
Duhet që të gjithë të dalin para drejtësisë. Ndryshimi i thellë është qëllimi im më i madh. Nëse politikanët nuk mbajnë përgjegjësi për veprimet e tyre, asnjë ndryshim nuk do të jetë i vërtetë. Ajo që ndodhi dje ishte një farsë kushtetuese. Dje shqiptarët fituan një betejë. Shqiptarët triumfuan sepse ne e duam vendin tonë si e gjithë Evropa. Rama është një kryeministër i dështuar”, tha Basha.
