Përgjatë një lidhje direkte në emisionin “Opinion” në “TV Klan” kryetarja e LSI-së Monika Kryemadhi ka treguar planin e kryebashkiakut Erion Veliaj për t’i zënë vendin kryeministrit Edi Rama.
“Veliaj po e përdor këtë situatë në favor të tij dhe ka në plan t’i zërë vendin Ramës. Po e nxit Ramën që të mbahen zgjedhjet, edhe të sigurojë mandatin e tij si kryebashkiak i Tiranës prapë, dhe më pas të dalë si shpëtimtar”, ka pohuar Kryemadhi.
Sipas saj, Veliaj ka në mendje një plan ‘djallëzor’ që në rastin më fatal për vendin, nëse ka viktima, këtë fakt ai do e përdorë në favor të tijin për të marrë pushtetin në duar dhe të dalë si ‘shpëtimtar’.
Ndër të tjera Kryemadhi theksoi publikisht se: “Nuk ka më bir nëne që e shpëton Edi Ramën”.
Ndërsa lidhur me protestën që do mbahet ditën e nesërme nga opozita, kryetarja e LSI-së tha: “Do të jetë paqësore, do ta menaxhojmë me përgjegjshmëri të plotë. Nuk kanë faj policët e shtetit. Mos harroni që nuk është më tashmë në dorën tonë, çdo ditë që Rama provokon popullin, aq më shumë irritohet”.
