Ka nisur me përplasje mbledhja e Komisionit Qendror të Zgjedhjeve, mbi çdekretimin e datës së zgjedhjeve nga presidenti Meta. Kryetari i KQZ-së, Klement Zguri tha se KQZ nuk është Gjykatë Kushtetuese që të bëjë interpretimin e vendimit të presidentit, por është institucion zbatues.
“Jemi në një moment sfide, pra kemi nga një anë dekretin e Presidentit dhe axhendën e njoftuar nga dy anëtarët të KQZ. S’më ka rënë rasti ndonjëherë që të vëmë në diskutim dekretin e Presidentit. Kanë qenë tre rastet kur Presidentët kanë çdekretuar datën e zgjedhjeve.
Unë mendoj që KQZ dhe unë personalisht, duhet ti bindemi një produkti të tillë, këtij dekreti. Jemi përballë këtij fakti, s’dua të gjykoj kompetencën e Presidentit, nuk jam Gjykatë Kushtetuese të vlerësoj është i ligjshëm ose jo dekreti i Presidentit. Vihem përballë një vështirësie tjetër, pra pika e dytë thotë që KQZ-ja të marrë masa për të zbatuar këtë vendim.
Jam përballë një vështirësie, që refuzohet t’u dërgohet ky dekret partive politike. Kjo është fare banale, por duhet të ketë një vetë përmbajtje, dhe institucionet duhet të kuptojnë që respektimi i hierarkisë duhet zbatuar”, tha Zguri, raporton Panorama.
Ai tha se nuk është gjendur ndonjëherë në një situatë të tillë, ku të vihet në diskutim dekreti i Presidentit.
“Nuk është KQZ organi që duhet të bëj vlerësimin e dekretit të Presidentit. Anëtarët e KQZ janë vullnet inferior në raport me Presidencën. Është një lloj sfide që i bëhet dekretit të Presidentit, nga dy kolegët e KQZ. Unë jam i detyruar që të çohem nga kjo tavolinë”, tha Zguri.
Më tej, Zguri vendosi që të braktisë mbledhjen, së për shkak se anëtarët e zgjedhur nga maxhoranca në këtë institucion nuk kanë dashur të zbatojnë dekretin e Presidentit për anulimin e zgjedhjeve.
Kështu, katër anëtarët e zgjedhur nga Partia Socialiste në Komisionin Qendror të Zgjedhjeve kanë refuzuar të zbatojnë dekretin e Presidentit Meta për anulimin e datës së zgjedhjeve, duke e cilësuar atë si të pavlefshëm e më tej kanë vijuar me mbledhjen normale të këtij institucioni.
Mbledhja është drejtuar nga nënkryetari i KQZ-së, Denar Biba, i cili ka thënë se sipas Kodit Zgjedhor, i takon atij e drejta për të ushtruar kompetencat e kryetarit.
Anëtarët e KQZ-së të zgjedhur nga PS kanë vijuar mbledhjen normale dhe kanë miratuar me katër vota pro projektvendimin për ndarjen e fondeve të partitë politike.
