Pas vendimit të presidentit Meta për të anuluar datën e zgjedhjeve vendore, ka ardhur dhe reagimi i kreut të Partisë Republikane, Fatmir Mediu.
Përmes një postimi në “Facebook”, Mediu shkruan se Meta ka shmangur një konflikt, ndërsa shtoi se grupimi i qendrës së djathtë ia ka kërkuar paraprakisht, pasi e konsideron si rrugën e vetme kushtetuese.
“Presidenti ka garantuar pluralizmin dhe njëkohësisht ka hedhur hapin e parë për një zgjidhje që garanton zgjedhje të lira dhe të ndershme. Qëndrimi i Ramës është sa antikushtetues dhe puçist. Institucionet zgjedhore nuk veprojnë me vendim qeverie, por me dekret Presidenti”, tha Mediu.
Postimi i plotë:
Presidenti i Republikës me vendimin e sotëm për çdekretimin e zgjedhjeve, ka shmangur një konflikt që do e çonte Shqipërinë në drejtime të gabuara.
Si GQD i kemi kërkuar Presidentit të Republikës pikërisht këtë që bëri sot, si rruga e vetme kushtetuese.
Ai është autoriteti i vetëm që vlerëson kushtetutshmërinë e vendimit të tij në mungesë të Gjykatës Kushtetuese, duke çdekretuar dekretin e tij.
Presidenti ka garantuar pluralizmin dhe njëkohësisht ka hedhur hapin e parë për një zgjidhje që garanton zgjedhje të lira dhe të ndershme.
Qëndrimi i Ramës është sa antikushtetues dhe puçist. Institucionet zgjedhore nuk veprojnë me vendim qeverie, por me dekret Presidenti.
Për sa kohë Presidenti ka çdekretuar zgjedhjet, KQZ duhet të ndalë funksionimin e Komisioneve Zonale dhe proçesit zgjedhor.
Çdo veprim tjetër është i paligjshëm dhe antikushtetues.
I vetmi Institucion që mund të interpretojë vendimin e Presidentit është Gjykata Kushtetuese, e cila nuk ekziston prej dy vitesh, e shkatërruar qëllimisht prej Ramës.
Është koha për zgjidhje politike, Qeveri Tranzitore dhe zgjedhje të lira dhe të ndershme.
