Kryeministri Rama vijon prezantimin e kandidatëve për kryetar bashkie për zgjedhjet e 30 qershorit. Nga Kurbini, ai prezantoi kandidaten e këtij qyteti, Majlinda Cara, ku tha se për herë të parë pas 30 vitesh do të votojnë për një grua.
Gjatë fjalës së tij, Rama ka komentuar dhunën e ushtruar ndaj dy protestuesve, babë e bir, për të cilët opozita pretendonte se ishin dhunuar nga policia.
Ai tha më tej se kjo situatë ka agravuar edhe më tej, pasi ata kanë frikë nga zgjedhjet, dhe nga Reforma në Drejtësi.
“Plaku që i mban lidhur ai kokrat e tespieve, nxori sikur protestuesit janë rrahur nga policia, por në fakt ata janë rrahur nga ata vetë. Huliganë me shkopa hekuri, që iu shkaktuan gjithë ato dëmtime.
Sado inat ta kenë këtë qeveri, si mund të shkojnë të përzihen në turma, ku disa vijnë me shkopa hekuri, kur në vijën e parë janë njerëz me kapuç të zinj, kur i dyti iu bërtet dhe i ulëret instikteve më të egra të njeriut për të përdorur dhunë.
Gjithmonë e më pak do të jenë. Nuk meritojnë as respektin e demokratëve që janë qytetarë të ndershëm, që mund të duan një qeveri tjetër, por jo që Shqipëria të kthehet prapa.
Kanë drejtues që ishte kryebashkiak i Tiranës dhe nuk rregulloi sahatin. Shqiptarët e dinë që ka plot politikanë që i dinë shqiptarët për budallenj, por shqiptarët e dinë dhe kanë një arsye që nuk e thonë pse nuk hyjnë në zgjedhje.
Kanë frikë nga zgjedhjet, por kanë panik edhe nga drejtësia, nga Reforma në Drejtësi, prandaj duan rrëmujë që të mund të përmbysin edhe reformën”.
