Disa tërmete të fuqishme kanë lëkundur vendin orët e para të mëngjesit të sotëm. Epiqendra e tërmetit 5.3 ballë ka qenë 12 km vije ajrore mes Korçës dhe Ersekës në Flloq. Lëkundjet e njëpasnjëshme janë ndjerë rreth orës 06:30 të mëngjesit ndërsa raportohet se kanë shkaktuar dëme materiale. Banorët e rrethit të Korçës janë alarmuar nga lëkundjet e forta.
Pas lëkundjeve të forta të shënuara sot në Korçë, është mbledhur Shtabi i Emergjencave. “Dëmet e shkaktuara janë të mëdha. Dëmi më i madh është bërë në fshatin Flloq. Rreth 70 shtëpi janë dëmtuar rëndë dhe banorët nuk lejohen që të rrinë akoma në banesa. Të njëjtin mendim ndajnë edhe ekspertët”, raporton News 24.
Bëhet me dije se banorët e fshatit Flloq janë traumatizuar. Ndërkaq, bashkia dhe institucionet kanë marrë masa pas tërmetit që tronditi jug-lindjen e vendit. Forcat e armatosura kanë dërguar një numër të caktuar çadrash. Banorët do të pajisen me çadra përpara se të errësohet. Pikërisht çadrat do shpërndahen edhe në Qafë–Zezë.
Mjediset publike në fshatin Flloq, si shkolla dhe lokali i fshatit janë vënë në dispozicion të fëmijëve, që ata të strehohen. Janë ofruar po ashtu paketa ushqimore të çastit.
Prefekti Dhori Spirollari deklaroi se Bashkia Korçë ka marrë masa pas rënies së tërmetit. “Bashkia e Korçës të marrë masa për ujin e pijshëm. Të gjithë elementët e tjerë që duhet t’u vijmë në ndihmë. Nëse do na duhen vullnetarë, rinia korçare të vijë në ndihmë të vënies së çadrave”, tha Spirollari.
