Dy ditë më parë, kryetari i Bashkisë së Durrësit, Vangjush Dako u thirr në Prokurorinë e Krimeve të Rënda ku dëshmoi në lidhje me dosjen “339”.
Në lidhje me këtë rast, ka folur dhe avokati i njohur, Spartak Ngjela, i cili thekson se kryeministri Rama nuk ka ndërhyrë për të shpëtuar kryebashkiakun Vangjush Dako.
I ftuar në “360 Gradë”, deklaroi se nëse Rama do të ishte aq i fortë, do të arrestonte opozitën dhe jo njerëzit e vetë.
“Nuk ka ndërhyrje kryeministrore për të shpëtuar Dakon. Po të ishte kryeministri kaq i fortë do arrestonte opozitën, pse të arrestonte të vetët. Rama nuk drejton dot reformën në drejtësi po bën sikur për të thënë njerëzit që e drejton ai. Të dy palët kanë frikë nga reforma në drejtësi. Mos u ngutni, lërini ngjarjet të rrjedhin vet sepse do ketë shumë të pandehur”, tha Spartak Ngjela.
