Ish-deputeti i PD-së, Klevis Balliu, ka publikuar një foto të ministrit të Brendshëm, Sandër Lleshaj, në krah të njërit prej bashkëpunëtorëve më të përfolur të Sigurimit të Shtetit, Dhori Spirollarit, i njohur me pseudonimin ‘Studiuesi’. Me anë të një postimi në rrjetin social Facebook, Balliu shkruan se ministri Lleshaj dikur ishte një vartës i babait të tij, Fahri Balliut, dhe që prej asaj kohe ka përparuar shumë në grada duke u servilosur.
Mjaft i revoltuar, ai shkruan më tej se fuqia e qytetarëve nuk përballohet dot nga një servil si ai. Referuar protestës së organizuar nga opozita e bashkuar, ish-deputeti i PD-së kërkon nga Lleshaj që të marë përgjegjësi për dhunën ndaj qytetarëve.
“Në krah të Dhori Spirollarit, bashkëpunëtor i Sigurimit të Shtetit me pseudonimin ‘Studiuesi’, Sandër Leshi kërcënon qytetarët. Në fakt Spirollari duhet shkarkuar nga detyra, pasi ai është konfirmuar si pjesë e Sigurimit të Shtetit edhe nga Autoriteti i Dosjeve.
Sandër Lleshi që kur mbushje kafen e babait tim ke ecur goxha, por ti e di mirë që fuqia e qytetarëve nuk përballohet dot nga një servil si ty.
Farsa elektorale nuk ka më në Shqipëri është koha për zgjedhje. Tani ty në fakt atë të kanë thënë të thuash dhe po e deklaron, por duhet të kesh parasysh që përgjegjësi do të mbash edhe ti për dhunën ndaj qytetarëve dhe arrestime e paligjshme që ke bërë”.
