Prej vitit 2005 në më shumë se 120 vende të botës, 17 Maji shënon Ditën Kundër Homofobisë. Ku synohet rritja e ndërgjegjësimit për të drejtat e komunitetit LGBTI. Si edhe bëhet apel për respektimin e të drejtave të tyre në shoqëri. Teksa në Shqipëri vetëm vitet e fundit ka filluar të flitet, duket se pjesa më e madhe e shqiptarëve ende nuk janë të mësuar.
Prej brezash të tërë, familjet shqiptare njihen për patriarkalizmin dhe e kanë të vështirë të pranojnë mentalitete të ndryshme nga ato që ata e quajnë ‘normale’. Por, kështu jo pak herë hyhet në një ‘luftë’ konceptesh, se çfarë quhet normale. Tirana Today pyeti qytetarët se çfarë mendimi kanë ata për komunitetin LGBTI dhe cili do të ishte qëndrimi i tyre nëse fëmija i tyre do të ishte gay apo lesbike.
“Do e vrisja me dorën time, nuk kam çfarë tjetër t’i bëj.”
“Nëse fëmija im do të ishte i tillë, do e përjashtoja, do t’i vija perden e hekurt. Është anti-njerëzore, anti-shqiptare. Për mua ata nuk janë shqiptarë, më shumë kanë prejardhje nga bagëtia dhe jo nga njeriu. Çdo njeri që mund të ketë fëmijë gay ose lesbike, duhet t’i braktisë, t’i nxjerrë nga shtëpia e t’i lënë nëpër fusha. Të ikin nga të duan, nuk janë pjellë e jona ata.”
Ne jemi malësorë, jam nga Shkodra dhe atje nuk ka të tillë. Çdo gjë e keqe nuk fillon në Shkodër, por fillon në qarkun e Elbasanit, Peqinit, Rrogozhinës, Kavajës. Ata i ka fal Zoti vetëm të diskreditojnë familjen e vetë, ata që kanë. Kurse një pjesë tjetër që janë gay ose lesbike vijnë nga Shtëpia e Fëmijës.”
“Aaa mos më ngatërro mua, jam i moshuar burrë-plakë. Mos më ngatërro me këto punë.”
“Ato janë jashtë normales njerëzore, kundër rrjedhës së jetës. Me gjithë kuptimin janë njerëz të degraduar, kur i shoh në televizor e fik direkt. Mos o Zot, mos t’i kem në lagje kjo do jetë e mira. Nesër që do bëjnë paradë as nuk do dal në Tiranë, nuk dua t’i shoh.”
“Normalisht që nuk është normale, por janë të sëmurë. Shkojnë vajza me vajzën e burri me burrin, janë probleme të brendshme që as doktori nuk mund të ndërhyjë në këto punë.”
Teksa ky është një nga debatet më të nxehta në shoqëri dhe shumë prej të pyeturve e konsideruan si ‘sëmundje’, të tjerë mendojnë ndryshe. Për disa nga qytetarët orientimi seksual i ndryshëm është diçka normale, që duhet pranuar.
“Ky është një koncept që i përket një epoke shumë të vjetër. Unë njoh njerëz që kanë preferenca seksuale të ndryshme, por nuk e shprehin haptas. Kjo sepse në Shqipëri është ende shumë fobi.”
“Nuk ka asnjë problem, do ta kisha pranuar një person në shoqërinë time që është me preferenca seksuale të ndryshme. Është shumë e thjeshtë, jeto dhe lëri të tjerët të jetojnë.”
“Unë nuk jam homofob, por kjo nuk do të thotë që të kërkosh më shumë nga ajo që të takon. Kjo do të thotë që ji homoseksual, por mos e shty te njerëzit e tjerë. Pse duhet të bësh paradë, kur mund ta pranosh vetëm te vetja.”/ TIRANA TODAY
