Kryedemokrati Lulzim Basha ka thirrur në një mbledhje urgjente Kryesinë e Partisë Demokratike. Pas pothuaj 6 orësh protestë, Basha foli para protestuesve të cilëve u kërkoi pak kohë, në mënyrë që të konsultohet me Kryesinë për të marrë vendimin mbi qëndrimin që do mbahet në vijim.
Ndër të tjera, Basha nuk kurseu as akuzat ndaj kryeministrit Rama, për të cilin tha se i shpalli sot luftë popullit shqiptar.
“Kam thirrur mbledhje urgjente pas luftës së Edi Ramës ndaj popullit të tij, duke ju falënderuar nga zemra për këtë qëndresë, ju kërkoj mirëkuptimin për kohën që do na duhet për të marrë vendimin për mënyrën se si do vazhdojë beteja jonë, e cila do vijojë deri sa ta çlirojmë qeverinë nga krimi. Ju jeni sot ushtria demokratike, armata e lirisë dhe Evropës, shpresa e vetme që ky vend të bëhet si gjithë Evropa. Ju kërkoj ndjesë, do shkëputem për një kohë që shpresoj të jetë jo shumë e gjatë, për të marrë vendimet përkatëse”, tha Basha.
