Qytetarët janë thirrur nga opozitarët të protestojnë sot në 18:30 përpara Kryeministrisë. Opozitarët kanë kërkuar leje deri në mesnatë, ndërsa Policia e Tiranës ka dhënë leje deri në orën 20:30.
1500 efektivë të policisë pritet të jenë të angazhuar sot në terren për mbarëvajtjen e protestës së opozitës. Godina e Kryeministrisë është e rrethuar me gardh metalik. Vihet re një masë e shtuar e policisë, për të shuar çdo skenar të mundshëm që mund të kenë protestuesit.
Efektivët e policisë do të jenë të pajisur me maska kundragaz. Në Bulevardin ‘Dëshmorët e Kombit” policia ka instaluar kamera me rezolucion të lartë, për të filmuar çdo person të dhunshëm, apo që cënon rendin publik.
Turmat do të monitorohen nga godinat e larta, nga forcat RENEA dhe efektivët e Gardës. Masa sigurie do të ketë edhe në institucione të tjera të pozicionuara në Bulevardin ‘Dëshmorët e Kombit”. Në gatishmëri do të qëndrojnë dhe autobotet me ujë, për të shpërndarë turmat si edhe shërbimi zjarrfikës dhe ai shëndetësor.
