Pas fjalës së Ramës, kryesisht lidhur me Samitin e Berlinit dhe mënyrën si u komentua në vend, mbledhje e grupit parlamentar të PS-së, ka vijuar me dyer të mbyllura. Kreu i qeverisë ka dhënë disa porosi për drejtuesit politikë, ndërsa mësohet se fokusi ka qenë pikërisht të zgjedhjet lokale.
Kryeministri ka udhëzuar që kandidatët për garën e bashkive të zgjidhen njësoj sikur në zgjedhje të ishin përballë opozitës, pavarësisht se kjo e fundit është shprehur se do t’i bojkotojë ato.
“Gjeni kandidatët më të mirë për kryetarët e bashkive. Kandidatët të jenë të fortë, të zgjidhen sikur në zgjedhje do të futetet opozita”, u ka thënë Rama deputetëve të grupit të PS.
Kjo porosi e Ramës paralajmëron lëvizje të reja në politikë, që mund të sjellin pjesëmarrjen e opozitës në zgjedhje dhe zgjidhjen e ngërçit politik. Megjithatë, mbetet të shohim se çfarë qëndrimi do të mbajë opozita e bashkuar, e cila kërkon largimin e Ramës dhe krijimin e një qeverie tranzitore.
