Vijon përplasja Rama-Haradinaj, pas deklaratës së këtij të fundit lidhur me Samitin e Berlinit, teksa tha se ka qenë i vetëm në këtë samit, pasi Thaçi dhe Rama i kanë bërë presion për të pranuar heqjen e taksës ndaj mallrave serbe.
Lidhur me këtë deklaratë të fortë, kryeministri Rama tha se “Haradinaj nuk e ka kuptuar ende një normë elementare të mirëkuptimit njerëzor, që sipas tij është edhe rregull udhëheqësish, që kur flasin diçka mes tyre, nuk i komentojnë ato në publik.”
E këtij komenti, Haradinaj i është përgjigjur me fjalët se do e thotë gjithnjë të vërtetën, i pëlqen apo jo dikujt:
“Kërkesa që me u pezullu taksa nuk është e re. As pozicioni im nuk është i ri, është i qëndrueshëm. Nuk ka pse me u diskutu. Për mu shqiptarët janë vëllezërit dhe motrat e mi. Të vërtetën do ta tregoj çdoherë, edhe nëse nuk i pëlqen dikujt”, ka thënë mes tjerash kryeministri.
Haradinaj tha më tej: “Ato që kam thënë në intervistë ajo qëndron. Është më rëndësi që të kemi një qëndrim publik. Kosova është e qëndrueshme në qëndrimet e veta, pala që nuk qëndron në qëndrueshmëri dihet ku përfundon. Derisa Serbia nuk është gati të na njoh nuk kemi as na pse të mërzitemi.”
Këto komente, kryeministri i Kosovës i bëri për mediat pas mbledhjes së rregullt të Qeverisë. Lidhur me Samitin e Berlinit, ai tha:
“Si Kosovë duhet të falënderojmë Macron dhe Merkel për këtë iniciativë. Pjesa kryesore i është kushtuar marrëdhënieve Kosovë Serbi. Kosova duhet tani të plotëson formatin e vet pasi bëhet fjalë për dialogun dhe marrëdhëniet Kosovë – Serbi, pra finalja është se qëndrimet janë formësuar. Nuk shkohet më për ndryshim të kufijve”, ka thënë ai.
Kryeministrit ka deklaruar se është konfirmuar pjesëmarrja e Kosovës në takimin e Parisit, për të cilin është thënë se do të mbahet më 1 ose 2 korrik të këtij viti. Në këtë takim, Kosova sërish do të jetë tema kryesore.
“Me rëndësi është të theksohet se ne kemi konfirmu pjesëmarrjen për takimin në Paris. Kam kërkuar edhe pjesëmarrjen e kolegëve të tjetër në Paris dhe Macron e ka miratuar. Jemi në situata shumën më serioze dhe më të qëndrueshme”, është shprehur Haradinaj.
