Dëshpërimi po e çon opozitën e vjetër PD-LSI, në veprime gjithnjë e më radikale. Bllokimi i disa akseve rrugore pasditen e djeshme, është provuar edhe më parë. Madje edhe nga opozita e dikurshme e PS. E ashtuquajtura mosbindje civile, tenton të tregojë se situata në vend, nuk është normale.
Se zgjedhjet lokale duhen shtyrë, se qeveria Rama duhet të pasohet nga një qeveri tranzitore, që duhet të përgatisë zgjedhjet e parakohshme. Por nëse do t’u besojmë sondazheve, të paktën gjysma e qytetarëve nuk e mendon kështu. Dhe një pjesë e mirë, kanë bindjet e tyre politike, por nuk janë militantë fanatikë.
Ata duan të vazhdojnë jetën e tyre normale. Bllokimet e rrugëve, i penalizojnë të gjithë, përveç politikanëve dhe shtetarëve. Në çdo rast, Rama ia ka dalë të shmangë çdo lloj bllokimi, pasi shteti ka monopolin e dhunës. Qytetari, rrezikon të përplaset në rrugë me protestuesit e PD dhe LSI. Policia, e frustruar nga akuzat për dhunë të tepruar, gjatë protestave të opozitës para kryeministrisë dhe parlamentit, heziton të ndërhyjë që në fillim.
Këtë javë në protestat e Jelek-Verdhëve në Paris, policia përdori masivisht shkopinjtë e gomës, gazin lotsjellës dhe ujin, për shpërndarjen e protestuesve. Në Londër, policia tërhoqi zvarrë të rinjtë që protestonin kundër ndryshimeve klimatike, për shkak se kishin bllokuar rrugët. Franca dhe Anglia, janë vendet kryesore demokratike në Perëndim dhe botë, dhe ne i marrim shpesh si shembull të shtetit ligjor.
Për ta e drejta e protestës, është po aq e shenjtë sa edhe e drejta e të tjerëve që nuk protestojnë, që të qarkullojnë lirshëm në rrugë dhe sheshe, që janë pronë e të gjithëve. Anormaliteti që kërkon të imponojë treshja Berisha-Basha-Kryemadhi, nuk po ngjit. KQZ po përgatit zgjedhjet lokale, opozita e re në parlament, është bërë pjesë e reformës zgjedhore, ndërsa BE po inkurajon zhvillimet e fundit në reformën në drejtësi. /TIRANA TODAY