Shqipëria i ka plotësuar kushtet për në BE. Kështu u shpreh kryeministri Rama në seancën plenare, ndërsa në fokus solli të ashtëquajturit ‘peshqit e mëdhenj”. Ai foli edhe për forcat që punojnë kundër Shqipërisë, që të jetë larg BE-së, ndërsa vendosi pikat mbi ‘i” se reforma në drejtësi është reformë pa kthim.
“Lufta me korrupsion është luftë për modernizimin e shtetit, dhe është kjo pjesë që kërkon kohë dhe durim të madh, pasi nuk mjaftojnë hetimet, por vendosja në sistem e mekanizmave që kanë kapacitet që ta bëjnë të pamundur korrupsionin”, tha Rama.
Deklarata
“Shqipëria i ka plotësuar të gjitha detyrat për të çelur negociatat për në BE. Është shumë e rëndësishme për të gjithë, që të kuptohet se çelja e negociatave është një vendim që merret nga Këshilli Europian, bazuar në rekomandimin e komisionit, por edhe si rezultat i dinamikave të brendshme në vendet anëtare.
Nëse raporti ndërtohet mbi kritere ekskluzivisht teknike, duke konfirmuar detyrat për çeljen e negociatave, vendimmarrja ne KE është rezultat i debatit të brendshëm, e ku subjektiviteti politik i vendeve ka rolin e vet, te ky subjektivitet duhet të jemi shumë të qartë që ndikimi ynë është relativ dhe në kushtet kur në Shqipëri ka forca që janë qartësisht të rreshtuara në funksion të integrimit dhe çeljes së negociatave, dhe kam parasysh të gjithë ata që janë të pranishëm në këtë Kuvend, që përfaqësojnë atë pjesë dërrmuese të opinionit publik dhe shkojnë në vazhdën e një tradite.
Nga brenda vendit, u jepet forcave kundër zgjerimit e nuk e mirëpresin çeljen e negociatave një ushqim kundër interesave të këtij vendi, kjo është shumë e thjeshtë dhe lehtësisht e kuptueshme nga kushdo, nuk ka asnjë justifikim për eksportimin dhe nxitjen e konflikteve të brendshme në funksion të kësaj vendimmarrje dhe krijimit të aleancave me forca që janë kundër zgjerimit”, deklaroi Rama.
