Një përplasje mjaft e fortë është shkaktuar sot ndërmjet ministrit Cakaj dhe deputetes së PD-së, Rudina Hajdari, në lidhje me shkarkimin e mbi 20 personave në Ministrinë së Jashtme.
Ministri në detyrë u shpreh se ka vendosur të shkëpusë marrëdhëniet për disa nga punonjësit që nuk përmbushin kriteret. Në seancën dëgjimore me ministrin Cakaj, Rudina tha se nuk ishte e bindur për këtë lëvizje, duke i kujtuar faktin se ai ka vetëm 77 ditë në detyrë.
Por ministri tha se ky qëndrim është i pavend, pasi është mjaftueshëm i familjarizuar me Ministrinë. Ai vuri theksin tek fillimi i një reforme të nevojshme, dhe se do të jetë para këtj procesi.
Hajdari: Nuk mund të merrni shembullin e opozitës, se nuk jeni deputet. Ju thatë shkarkimi apo transferimi. Ju keni 77 ditë në atë detyrë, më duket befasuese si arritët në atë përfundim aq shpejt kur paraardhësi juaj, ministri Bushati tha se unë po lë një trupë shërbimi diplomatik nga më të aftët. Ai djalë kishte 5 vjet aty. Ju nëse bëni mesazhe të tilla, deklarata të tilla se po shkarkoni 20 veta, a nuk po cënoni ju këta njerëz, profesionalizmin e shërbimit tuaj diplomatik. Uroj që të mos jetë një vendim represiv, politik pa dobi për shërbimin diplomatik.
Cakaj: Ministri Bushati për ju nuk është një djalë, por ministri me mandatin më të gjatë në atë institucion në historinë e pluralizmit. Ndaj kam dëshirë që komunikimi këtu të zhvillohet me parametra të rregullta.
Zoti Bushati ka thënë se ka lënë një administratë ambicioze, por s’do të thotë se nuk ka nevojë për përmirësime. Ne jemi këtu për të sfiduar status quo dhe ndaj jemi këtu si një qeveri aktive. Sa i përket emrave që janë larguar, unë e përsëris një pjesë e tyre e kanë kaluar mandatin e shkruar të punës. Kur ka tejkalime të tilla, duhet të ketë masa, mosmarrja e masave duhet t’u shqetësojë. Unë e kam marrë atë vendim jo se kam 77 ditë në atë detyrë, harroni se kam qenë dhe zëvendës ministër. Nuk është vendim arbitrar, por fillimi i një reforme të nevojshme.
