Kryetarja e LSI, Monika Kryemadhi në një lidhje direkte për emisionin ‘Opinion’ ka reaguar pas ngjarjes që ndodhi ditën e sotme me deputetin Ralf Gjoni, i cili u sulmua me bojë të kuqe në hyrje të banesës së tij.
Kryemadhi, në lidhje me këtë rast, u shpreh se jo vetëm që nuk është e përfshirë, por, sipas saj mund të jetë një skenar i realizuar nga Partia Socialiste.
“Opozita është në pozicionin e saj më legjitim dhe më të moralshëm.
Unë i kam duart e pastra, por është ajo që tha dhe z. Shehi që Rama për t’i bërë eksponentë që të flasin dhe për të larguar vëmendjen nga mungesa e tij prej disa ditësh në Shqipëri. Mendoj që mund të jetë edhe një skenar i realizuar prej tij.
Dhe të mos harrojmë që z. Gjoni është edhe një nga kundërshtarët kryesorë të Erion Veliajt, Endri Fugës, dhe gjithë grupit tjetër në ‘Mjaft’. Kështu që unë mendoj që mund të jetë diçka e realizuar nga pala tjetër, ose mund të jetë një marrëdhënie e drejtpërdrejtë e z. Gjoni me elektoratin e tij”, deklaroi Kryemadhi.
Gjoni është shprehur se ka djegie nga sytë, ndërsa një pjesë e bojës nuk hiqet nga lëkura, ndërsa thekson se sulmi ndaj tij ka qenë i porositur nga lart.
Pavarësisht sulmit ndaj tij në dalje të apartamentit, Ralf Gjoni, kandidat për deputet nga radhët e LSI-së, është paraqitur në seancën plenare të Kuvendit të Republikës për të bërë betimin.
