“LSI nuk ka asnjë përçarje”, kështu deklaron ish-deputetja e kësaj force politike, Klajda Gjosha e cila i referohet faktit që në Kuvend shumica e deputetëve të rinj janë nga LSI.
Në një intervistë për Gazetën Shqiptare, Gjosha tha se në fakt ky është një çlirim i LSI-së nga persona që e kanë dashur atë vetëm për interesa personale.
“LSI nuk ka asnjë përçarje, përkundrazi ka një çlirim nga të gjithë ata që kanë dashur atë vetëm për interesa. Të gjithë deputetët kanë të drejtë të marrin vendimin për zgjedhjet e tyre personale. Ata duhet të mbajnë vetë edhe përgjegjësitë përpara opinionit publik. Vendimi i partive për djegien e mandateve është vendim politik dhe asnjë zgjedhje personale nuk e cenon atë.”
Ish-deputetja është pyetur edhe për faktin se ajo është emri që LSI po mban ‘peng’ në bisedimet me PD për sfidantin e Erion Veliajt, post për të cilin thotë se nuk ka qenë asnjëherë një ambicie për të.
“Nuk ka qenë kurrë ambicia ime dhe nuk kam pasur asnjëherë diskutim të tillë. Në këtë situatë qe ndodhet vendi besoj se kemi çështje shumë më të rëndësishme për të diskutuar. Sot diskutohet për ekzistencën e një kombi, për ruajtjen e identitetit kombëtar, për vlerat e humbura të demokracisë e për Shqipërinë e së ardhmes. Tema e emrave dhe individëve do të ishte luks në këto momente”, tha Gjosha.
