Kreu i qeverisë Rama priti dje në një takim presidentin e FSHF-së, Armando Dukën lidhur me situatën aktuale në futbollin shqiptar, ndërsa të hënën pritet të mbahet një tjetër takim mes tyre.
Mësohet se FSHF do t’i parashtrojë kryeministrit Rama tri kërkesa, në një takim të nivelit të lartë ku do të jenë të pranishëm edhe ministrja e Arsimit dhe Sportit, Besa Shahini dhe Drejtori i Policisë së Shtetit, Ardi Veliu.
Federata do t’i kërkojë kreut të qeverisë tre pika, të cilat janë zbardhur nga BalkanWeb.
Pika e parë ka të bëjë me ndryshimin e ligjit të sponsorizimeve, ku futbolli të ketë përfitime nga taksat. Pika e dytë ka të bëjë me ndryshimin e kodit penal, shkeljet ne stadium, invadimin i fushës etj, të cilat tashmë duhet të ndiqet edhe penalisht për të minimizuar aktet e dhunës. Dhe pika e tretë është edhe ajo më e debatuara kohët e fundit, rishikimi i ligjit të sportit dhe rikthimi i policisë në stadiume.
Natyrisht që pikat do të diskutohen, por burime si nga Federata Shqiptare e Futbollit, ashtu edhe nga Kryeministria, bëjnë me dije se që ditën e hënë pritet një akord, i cili do të lejojë më në fund që të shkelmohet topi nga mesi i fushës që në ndeshjet e së mërkurës për Kupën e Shqipërisë.
