Presidenti Ilir Meta ka thënë se duhet filluar puna për dialog mes qeverisë dhe opozitës, në kushtet kur do të merret një vendim për çeljen e negociatave të Shqipërisë me BE-në.
I pyetur nëse është gati që të ndërmjetësojë një dialog mes qeverisë dhe opozitës në këtë periudhë krize politike, Meta tha se kriza politike, Kushtetuese dhe institucionale mund të ishte shmangur, ndërsa kërkoi që palët të bëjnë hapa pas.
“Interesi kombëtar duhet të na shtyjë drejt zgjidhjeve të mençura politike drejt kësaj situate”, përfundoi Meta gjatë një konference me homologun slloven.
Fjala e plotë e presidentit lidhur me zgjidhjen e krizës politike në vend:
Shumë thjesht mund t’ju sqaroj se jemi në kushtet e një krize politike kushtetuese dhe institucionale, e cila mund dhe duhet të ishte shmangur. Në mënyrë të vazhdueshme kam apeluar për dialog midis palëve, jo vetëm për të evituar këtë situatë, por për t’i paraprirë atij vendimi të rëndësishëm, për mundësinë e çeljes së negociatave. Një ditë pas vendimit të qershorit për negociatat, kam thënë se duhet filluar puna për dialog mes qeverisë dhe opozitës, pasi siç iku një ditë, mund të ikë edhe një vit kam thënë më herët. Dhe ja ku jemi në këto kushte.
Palët të bëjnë hapa pas dhe të reflektojnë me përgjegjshmëri për të rivendosur normalitetin politik, kushtetues dhe institucional.
Kur ka interes kombëtar, duhet të na shtyjë drejt zgjidhjeve të mençura politike drejt kësaj situate./ Tirana Today
