Studentët për të gjashtën ditë radhazi kanë dalë edhe sot në marshim nga Politekniku drejt Ministrisë së Arsimit, për të protestuar kundër tarifave të larta dhe kushteve të studimit.
Ata kanë përpiluar një kërkesë me 15 pika, dhe kërkojnë një zgjidhje nga institucionet, që të ndalin tubimet e tyre. Ashtu si në ditët e tjera, edhe sot nuk kanë munguar pankartat e shumta ironizuese dhe krahasimet që shpesh herë e tejkalojnë çdo fantazi.
Së fundmi preh e talljeve të studentëve kanë rënë mesfushori i Interit, Antonio Candreva dhe ish-trajneri i Arsenalit, Arsen Wenger. Në një pankartë thumbuese drejtuar kryeministrit Edi Rama shkruhej: “Dialogjet e tua janë si krosimet e Candrevës”.
Kujtojmë që kryeministri ka kërkuar që të takohet me studentët dhe të dialogojnë së bashku, por shihet qartë që këta të fundit janë pesimistë dhe i krahasojnë dialogët e kreut të shtetit me krosimet e italianit, që me thënë të drejtën lenë për të dëshiruar.
Nuk mungoi as shprehja që për shumë kohë u bë virale në rrjetet sociale: “Wenger out”. Dy perla nga dita e gjatë e protestës që nuk mund të kalonin pa u vënë re.
