Italia nuk njeh ngadalësim të numrit të viktimave dhe të të infektuarve me koronavirus. Aty bilanci është tragjik, e ndërsa mjekët duket sikur janë dorëzuar para kësaj fatkeqësie.
Numri i personave që kanë humbur jetën për shkak të COVID-19 në Itali ka shkuar në 8165. Vetëm në 24 orët e fundit, 662 persona kanë ndërruar jetë për shkak të COVID-19.
Në rang kombëtar numërohen rreth 80.539 persona të infektuar nga ky virus. Nga 80.539 të sëmurë, rreth 10.361 janë shëruar nga COVID-19 në të gjithë territorin e Italisë.
Provinca më e prekur nga koronavirusi, ku janë shënuar më shumë viktima, vijon të mbetet Bergamo. Deputeti i provincës së Bergamos, Daniele Belotti, nuk i ka mbajtur dot lotët gjatë një fjalimi.
“Ne nuk e dimë ku të çojmë viktimat dhe ku të trajtojmë të sëmurët, por njerëzit e Bergamos nuk dinë të qëndrojnë duarkryq. Qindra vullnetarë janë duke vendosur një spital fushor, qytetarët kanë dhuruar miliona euro, kryetarët e bashkive dhe këshilltarët janë në radhën e parë duke ndihmuar. Faleminderit të gjithëve, sepse ne kurrë nuk do ndalemi”, është shprehur ai, teksa fjalimi i tij është ndërprerë nga emocionet dhe lotët.
