Shtatë deputetë të opozitës së re kanë kërkuar një interpelancë urgjente në parlament me ministrin e Brendshëm, Sandër Lleshaj.
Mësohet se kjo interpelancë është kërkuar që ministri të japë sqarime për situatën kriminale në vend. Deputetët Lefter Maliqi, Artur Roshi, Besnik Troplini, Ramazan Gjuzi, Fatjona Dhimitri, Halil Jakimi dhe Kostaq Papa e kanë depozituar kërkesën në Kuvend.
“Kërkohet një informacion për punën e dobët të policisë për zbulimin dhe parandalimin e krimeve. Marrëdhëniet polici-publik dhe sa ndikon depolitizimi i policisë në rastet e shkeljeve të ligjit. Aktualisht kemi një situatë të rëndë kriminale ku janë evidentuar raste të shumta, vrasje, rrëmbime, grabitje, kërcënimi, tritole, etj, në Vlorë, Shkodër, Elbasan, Tiranë, Lushnje, etj. Kërkohet informacionet për punën e policisë në këto raste.
Tejkalimi i kompetencave të policisë dhe përdorimi i gazit lotsjellës ndaj banorëve të zonave të ashtuquajtura “Bregu i Lumit” të Astirit, etj kundër familjarëve dhe pleqve, fëmijëve, grave. Në cilin ligj është mbështetur policia për të përdorur forcën dhe këto mjete dhe çfarë urdhri është dhënë në këto raste”, kërkojnë sqarime deputetët e opozitës së re.
Ata kërkojnë sqarime nga ministri Lleshaj, edhe lidhur me “akuzat e policisë ndaj gjykatës, si dhe aksidentet e shumta dhe masat e marra nga policia rrugore. Masat e marra dhe rezultatet e policisë ndaj kultivuesve të drogës dhe trafiqeve, roli i policisë kufitare në pikat doganore dhë në vijën bregdetare”, thuhet në kërkesën për interpelancë.
Në përfundim ata e mbyllin duke kërkuar nga ministri i Brendshëm edhe sqarimet e tij për procesin e vettingut në polici dhe “çështje të tjera që kanë të bëjnë me rendin, sigurinë në vend”, thuhet në kërkesën e drejtuar kryeparlamentarit, Gramoz Ruçi.
