Arbër Çekaj kërkon azil politik në Gjermani. Emri i tij bëri bujë në media në fund të shkurtit 2018, teksa në kontenierin e bananeve u gjetën plot 613 kilogramë kokainë.
Droga u gjet në kontenierin e bananeve, që vinte nga Kolumbia. Çekaj u arrestua më 4 maj në Gjermani. Gjatë shqyrtimit gjyqësor në Gjykatën e Essiel, mësohet se Çekaj ka kërkuar azil politik.
Çekaj u largua nga Shqipëria 3 javë para se të sekuestrohej sasia rekord e kokainës. Ai u shpall menjëherë në kërkim nga Policia, pasi kishte dyshime se ishte në Gjermani.
Vetëm pak ditë pas zbulimit të kokainës, Çekaj tha në një lidhje telefonike për mediat se ai nuk ka lidhje me sasinë rekord të kokainës gjetur në kontenierët e porositur nga ai dhe se në të vërtetë porosia ishte 20 ton banane nga Kolumbia.
Ai është aksioneri i vetëm i kompanisë “Arbri Garden”, siç del nga kërkimi në Qendrën Kombëtare të Biznesit. Nga një kërkim në internet, rezulton se firma “Arbri Garden” ka marrë 97 ngarkesa nga Amerika e Jugut që prej vitit 2012. Për sasinë rekord të kokainës, më 28 shkurt u arrestua Armando Pezaku, që drejtonte kamionin me targë DR 3819 dhe Donaldo Lushaj, që ndodhej si pasagjer, i cili kishte detyrën e menaxherit dhe do merrte në dorëzim mallin e mbërritur nga Kolumbia.
