Ministrja e Shëndetësisë, Ogerta Manasterliu ka mbledhur sot task-forcën për koronavirusin në sallën e emergjencave në aeroportin e Rinasit.
Gjatë fjalës së saj në mbledhje, Manastirliu theksoi edhe një herë se në Shqipëri nuk janë konfirmuar ende raste me koronavirus. Ajo i bëri thirrje qytetarëve që të informohen nga burime zyrtare dhe jo nga burime të tjera të cilat mund të jenë të rreme.
Kujtojmë se ditën e djeshme qarkulloi në rrjetet sociale një material audio, ku një vajzë fliste për 12 raste të infektuarish nga koronavirusi në vendin tonë.
“Ju kemi informuar për rastet e mundshme, ku 6 raste që janë analizuar nga ISHP kanë rezultuar negative. Jemi të përgjegjshëm dhe duhet të ecim me transparencë maksimale me publikun, për të gjitha masat që jemi duke ndërmarrë. Komunikimin me publikun e kemi thelbësor për të shmangur çdo dezinformim. Edhe dje jo pak mesazhe kanë qarkulluar që kanë nxitur panik. Nuk është koha që paniku t’i zë vendin arsyes. Është koha të vlerësojmë dhe dëgjojmë ekspertët, që në Shqipëri nuk mungojnë, të cilët po ndjekin planin e veprimit të miratuar nga tas-forca dhe strukturat në qeverinë shqiptare. Dua t’iu ftoj si media për t’iu pasur bashkëpunëtorë ashtu si dhe qytetarë, në një situatë që nuk kërkon panik, por përgjegjësi, transparencë dhe racionalitet. Jemi përballur dje me mesazhe të rreme, të cilat menjëherë kemi informuar nëpërmjet Ministrisë për jo vërtetësinë e tyre”, tha ajo.
