KLGJ ka pranuar kërkesën e kreut të ILD, Artur Metani, për shkarkimin e gjyqtarit Roland Hysi. Ky i fundit është gjyqtar pranë Gjykatës së Rrethit Gjyqësor Fier. Ai akuzohet për “korrupsion”, ndërsa është dënuar nga Gjykata për Krime të Rënda më 17 tetor të 2019-ës me 4 vite e 6 muaj burg. Për shkak të gjykimit të shkurtuar, ai përfitoi ulje dhe u dënua me 3 vite burg. Po ashtu gjykata vendosi t’i heqë gjyqtarit Hysi të drejtën e ushtrimit të funksioneve publike, për 5 vitet e ardhshme.
Trupa gjykuese e kryesuar nga gjyqtari Sandër Simoni vendosi; “Deklarimin fajtor të të pandehurit Roland Hysi, për kryerjen e veprës penale “Korrupsion pasiv i gjyqtarëve, prokurorëve dhe funksionarëve të tjerë të drejtësisë” parashikuar nga neni 319/ç të Kodit Penal”. Gjykata po ashtu vendosi t’i ndalojë Hysit, për pesë vjet të drejtën për të ushtruar funksione publike.
Gjyqtari i Gjykatës së Fierit, Roland Hysi, u arrestua së bashku me psikologen Elona Meçani pas publikimit të një videoje përgjimi kompromentuese, që përfshinte rryshfet në para dhe favore seksuale.
Hysi, ndaj të cilit ka po ashtu një vendim pezullimi nga Këshilli i Lartë Gjyqësorë, u shfaq në bisedat e siguruara nga emisioni “Stop” në ambientet e një lokali, ndërsa i kërkonte favore seksuale nënës së divorcuar. Në një rregjistrim tjetër shfaqet Meçani e cila i merr qytetares 500 euro në emër të gjyqtarit.
