Që prej vitit 1970, në mbarë botën kremtohet çdo 22 prill Dita e Tokës. Në shumë qytete, ndalohet lëvizja me makinë në rrugët kryesore, dhe promovohet ecja me biçikleta apo në këmbë. Ka shumë aktivitete sensibilizuese.
Por pavarësisht përpjekjeve, sot bota ka arritur një nivel të frikshëm të ndotjes. Organizata Botërore e Shëndetësisë, thotë se 9 nga 10 njerëz sot në botë, marrin frymë nga ajri i ndotur. Për pasojë, 7 milionë njerëz vdesin çdo vit, shumica në Azi, Afrikë dhe Evropën Lindore. Disa miliona të tjerë, vdesin nga sëmundjet kanceroze, të shkaktuara nga ndotja e ujërave në lumenj, liqene dhe oqeane.
Sipas raporteve të ndryshme mbi mjedisin, Shqipëria ndodhet në zonën e dytë të “rrezikut”, pas disa vendeve aziatike. Agjencia Europiane e Mjedisit, në raportin e vitit 2018, theksoi se në Shqipëri vdesin çdo vit mbi 1400 persona, nga sëmundje që shkaktohen vetëm nga ndotja e ajrit, ose 4 persona në ditë.
Numrin më të lartë të vdekjeve në rajon e kanë Kosova, Serbia dhe Maqedonia. Veç ndotjes serioze të ajrit, Shqipëria e ka ende të humbur betejën me mbetjet plastike. Çdo dimër dhe pranverë, shtratet e lumenjve dhe bregdetit, shndërrohen në pirgje gjigante plehrash, për shkak të dështimit të menaxhimit të mbetjeve urbane nga bashkitë e qyteteve.
Por përgjegjësia kryesore është e vetë qytetarëve. Një pjesë jo e vogël e tyre, vazhdojnë t’i hedhin plehrat ku të mundin, jo rrallë që nga dritarja apo ballkoni i apartamentit të tyre, si dhe u mungon tërësisht ndenja e përgjegjësisë së të jetuarit në komunitet./ Tirana Today
