Data 26 nëntor ka shënuar një nga ditët më tragjike ndër vite në vendin tonë. Tërmeti prej 6.4 ballësh ka shkaktuar me dhjetëra viktima, duke lënë në mëshirë të fatit me qindra njerëz.
Në kohën kur njerëzit e prekur janë larguar nga shtëpitë e tyre si pasojë e panikut të krijuar, fondacioni “Fundjavë Ndryshe” është kujdesur që banorëve t’u mundësojë gjërat më bazike.
Një solidarizim i madh ka ardhur edhe nga Kosova. Mbrëmjen e sotme, 4 kamionë me 50 ton ndihma kanë mbërritur në “Qendrën e Solidaritet”, nga ku do të shpërndahen në zonat e prekura.
Dhjetë kompani të ndryshme nga Kosova kanë ndihmuar me veshmbathje, ushqime, ujë, dyshekë dhe materiale të tjera. Oda Ekonomike e Kosovës, Viva Fresh Store, Albi Group, Bucaj, Migros Group, Afri Group, Abi Drink Shpk, Bonita, Naba NTP, Ferplas, janë disa nga kompanitë që kanë siguruar një sasi të konsiderueshme ndihmash, për të prekurit nga tërmeti.
Kujtojmë se më herët ditën e sotme, 11 kamionë të tjerë me mbi 200 ton ndihma kanë kaluar kufirin dhe kanë ndaluar pranë Qendrës së Solidaritetit.
Drejtuesi i fondacionit “Fundjavë Ndryshe”, Arbër Hajdari, është shprehur më herët se ndihmat do të grumbullohen në magazinën e Qendrës dhe menjëherë do të nisë shpërndarja kryesisht në Durrës e Thumanë.
“Vëllezërit nga Kosova dinë ta bëjnë mirë ndihmën e tyre dhe ka ardhur një sasi jashtëzakonsisht shumë e madhe ndihmash. Besoj se kjo ka qenë ndihma më e madhe që mund të ketë ardhur sot në Shqipëri. Ne kemi një program për shpërndarjen e ndihmave fill që pas tërmetit. Jemi të lokalizuar në disa pika, kryesisht në Thumanë e Durrës. Aty ku tërmeti ka bërë dëmet më të mëdha.
Por jo vetëm. Për shkak dhe të fluksit të madh të njerëzve do të bashkëpunojmë me instancat shtetërore. Për të bërë shpërndarjen që realisht çdo ndihmë të shkojë te ata njerëz që janë të mbetur pa shpresë, pa banesë. Dhe te ata që është më e rëndësishme, më të varfërit”, tha ai.
Që në ditën e martë kur edhe u ndje tërmeti, “Fundjavë Ndryshe” u nis drejt Thumanës dhe Durrësit me mbi 50 kamionë me ndihma. Rroba, ujë, dyshekë, veshmbathje, shtretër dhe ushqime të gatuara, janë dërguar në zonat e prekura.
Në fondin e organizuar nga “Fundjavë Ndryshe” në ‘gofundme’, në vetëm 2 ditë janë arritur të mblidhen më shumë se 1milion e 528 mijë dollarë. Shumë kjo e cila do të shkojë për të gjithë banorët e prekur nga tërmeti.
