Mbrëmjen e djeshme, një atentat me armë zjarri ka ndodhur në Kodër Kamëz. Viktimë e këtij atentati ka mbetur Can Kariçi, 35-vjeç. I riu mësohet se po qarkullonte me një automjet tip “Golf 5”, në momentin kur është qëlluar nga persona ende të paidentifikuar. 35-vjeçari Can Kariçi ka qenë në lokal me miqtë e tij, ndërsa është qëlluar sapo ka hipur në automjetin tip “Golf 5” me targa të huaja.
Dyshohet se vrasja është kryer me pistoletë me silenciator
Ka dyshime se ekzekutimi është kryer me pistoletë me silenciator, pasi nuk janë dëgjuar të shtëna arme. Menjëherë pas krimit, autorët janë larguar me një mjet tip “Audi”. Kjo makinë u gjet e djegur në zonën e Institutit, pak minuta pas vrasjes. Policia ka ngritur pika kontrolli, për të bërë të mundur arrestimin e autorëve.
Viktima me precedentë penalë
35-vjeçari Can Kariçi me origjinë nga Dibra dhe banues në Bathore, rezulton me precedentë të mëparshëm penal në fushën e krimeve kundër personit, ndërsa është arrestuar edhe në Lezhë gjatë një operacioni të RENEA-s për “armëmbajtje pa leje”. Kariçit asokohe iu gjet një pistoletë tip ‘GLOCK’ dhe 16 fishekë në xhepin e xhupit. Në shkurt të këtij viti kur është arrestuar, ka qenë i dyshuar edhe për “vjedhje”. Kjo pasi në ambientet e lokalit ku u arrestua u sekuestruan edhe targa të vjedhura, që u përkisnin automjeteve të tjera. Këto targa dyshohet se do të përdoreshin në ngjarje kriminale. Bashkë me të, në atë periudhë u shoqëruan edhe pesë persona të tjerë.
Vrasja në Kodër Kamëz/ Makina e djegur me targa të huaja, brenda saj një automatik
Makina e djegur në Institut që dyshohet se u përdor nga autorët është me targa të huaja. Po verifikohen nëse targat janë regjistruar në ndonjë shtet. Në brendësi të saj u gjet një armë zjarri kallashnikov.
