30-vjeçari Rigers Lala është arratisur mëngjesin e sotëm nga Komisariati numër 1 në Tiranë. Rreth orës 08:00 të mëngjesit, ai është dërguar për të dhënë shenjat e gishtave. Më tej do të dërgohej në Gjykatën e Tiranës, për të mësuar masën e sigurisë. Lala ka qenë i shoqëruar nga dy efektivë, ndërsa në një moment ai është larguar.
SHÇBA ka nisur një hetim për dy efektivët që shoqëronin 30-vjeçarin, ndërsa është ende e paqartë si ai është larguar.
Rigers Lala është arrestuar më 2 janar për “armëmbajtje pa leje”. 30-vjeçari u arrestua në zonën e “Ali Demit” në kryeqytet, nga forcat “Shigjeta”, teksa u kap duke qarkulluar me armë zjarri pa leje.
Në momentin që ka parë policinë, ai ka hedhur armën në tokë e ka tentuar të largohet me vrap.
Ai është kapur gjatë ndjekjes nga ana e efektivëve, dhe arma që posedonte është sekuestruar. Sot ai pritej të njihej me masën e sigurisë, përpara se të arratisej.
