Kryeministri Edi Rama njoftoi dje se bonusi i pensionistëve për çdo vit përgjatë periudhës 2022-2024 do të jetë 3.5 miliardë lekë. Sipas kreut të qeverisë, nga ky fond përfitojnë 683 mijë pensionistë. Bëhet me dije se javën që vjen, qeveria pritet që të miratojë vendimin duke përcaktuar kategoritë që do të përfitojnë bonus me rastin e festave të fundvitit. Sipas informacioneve, pritet që 638 mijë persona të përfitojnë 5 mijë lekë shpërblim.
Për vitin 2022, u parashikua rritje e fondeve për pensionet suplementare të ushtarakëve dhe punonjësve të policisë së shtetit, ku nga 3.6 miliardë lekë që janë shpenzuar këtë vit, gjatë vitit 2022, buxheti është rritur duke shkuar në afro 3.9 miliardë lekë. Përfitues do të jenë 30.957 persona. Në buxhet është parashikuar rritje që do të shkojë për pensionin e naftëtarëve. Nga 577 milionë lekë që janë planifikuar të shpenzohen deri në fund të këtij vit, gjatë 2022 kjo shifër është rritur në 749 milionë lekë. Rritje ka dhe për metalurgët, nga 81 milionë lekë që është plani për këtë vit, në 2022 parashikohet të jepen për këtë kategori 131 milionë lekë. Edhe për minatorët parashikohet rritje, nga 690 milionë lekë të planifikuara për këtë vit, vitin që vjen parashikohen 1.2 miliardë lekë. Do të ketë shpërblime për veteranët, ku janë parashikuar 76 milionë lekë.
