Në emisionin “Opinion”, janë publikuar pamje të videos së kamerave të sigurisë ku shfaqen momentet e zhdukjes së trupit të pajetë të Jan Prengës, në garazhin e kompleksit “Golden”. Gazetarja Klodiana Lala ka sqaruar dinamikën e ngjarjes, bazuar në fotot e publikuara. Ajo tha se filmimi i plotë zgjat 27 minuta. Ajo tha se trupi dyshohet se është groposur në rrethinat e Shijakut. Vrasësit kanë ndërruar rrobat e tyre, dhe i kanë djegur në një kazan jashtë garazhit, për të humbur gjurmët.
“Pengu ka hyrë i pajetë në resort rreth orës 12:30. Ai është nxjerrë nga automjeti Range Rover dhe më pas është transportuar në një furgon brenda garazhit të kompleksit “Golden”.
Range Roveri është nxjerrë më pas edhe është djegur. Furgoni me trupin e Prengës ka dalë rreth orës 20:30 të darkës, dhe më pas është kthyer në resort. Trupi dyshohet se është groposur në rrethinat e Shijakut. Personat në garazh kanë ndërruar rrobat e tyre, dhe i kanë djegur në një kazan jashtë garazhit”, sqaroi Klodiana Lala.
“Fshinë gjurmët, hoqën rrobat dhe pinë cigare”, gazetarja flet për Jani Prengën
Lala zbuloi gjithashtu se policia si fillim nuk kishte ndërhyrë në resort, nga frika se mos pengut i rrezikohej jeta. Kur është konfirmuar se Jan Prenga ka vdekur, atëherë uniformat blu kanë ndërhyrë.
“Në momentin që pengu ka hyrë në resort, policia ka hezituar të ndërhyjë, për shkak se ka patur frikë për jetën e tij. Në momentin që policia konfirmoi se pengu ka humbur jetën, atëherë ka ndërhyrë”, tha Lala.
Në 31 janar, gjykata la në burg 5 të arrestuarit për rrëmbimin dhe më pas zhdukjen e trupit të 49-vjeçarit Jan Prenga.
