Në një moment retorikash dhe përplasjesh të vazhdueshme mes presidentit dhe kryeministrit, Meta do jetë mbrëmjen e sotme në emisionin “Opinion”, për t’iu përgjigjur një sërë çështjesh tejet sensitive. Vetëm pak ditë para manifestimit të paralajmëruar të 2 marsit, presidenti do të pyetet nga gazetarët edhe mbi detajet e këtij manifestimi.
Në postimet e vazhdueshme që ka përcjellë në rrjetet sociale, Kreu i Shtetit jep mesazhin se në 2 mars do të mbahet manifestimi mbarëkombëtar dhe paqësor në mbrojtje të demokracisë. Për Metën, kjo protestë bëhet për të mbrojtur Kushtetutën dhe Gjykatën Kushtetuese.
E ndërsa Besëlidhja Kuq e Zi e 2 marsit, thirrur nga presidenti Ilir Meta po afron, ai do t’ju përgjigjet gazetarëve, lidhur me disa nga çështjet më të prekura të momentit, si: Gjykata Kushtetuese, akti normativ anti KÇK, kallëzimi penal ndaj ministres Gjonaj, grushti i shtetit, Këshilli i Emërimeve në Drejtësi etj.
Pasditen e sotme, zëdhënësi i presidentit Meta, Tedi Blushi, reagoi pas daljes për mediat të Etilda Gjonajt, duke thënë se ajo nuk i dha shpjegim asnjë prej veprimeve që kishte kryer për botimin në Fletore Zyrtare të akteve të KED, duke pranuar njëkohësisht fajin.
Blushi shprehet se tashmë kushti kryesor për hapjen e negociatave do të jetë hetimi dhe ndëshkimi i krimit kushtetues, të kryer nga ‘grupi i strukturual kriminal”, duke i bërë apel Gjonajt të tregojë shokët.
