12 vite në Kuvend, këngëtarja tregon si i ka rezistuar “fshesave” partiake

Këngëtarja Rosela Gjylbegu, prej 12 vitesh punon në Kuvendin e Shqipërisë. Ajo ishte e ftuar sot në “Wake Up”, ku foli për këtë pozicion që mban prej kaq shumë kohësh. Rosela Gjylbegu tha se falë punës që bën ajo është vlerësuar, duke mos e cënuar asnjëherë.

Rosela e la të nënkuptuar se falë punës së ndershme, ajo i ka rezistuar “fshesave” partiake. “Mendoj se puna më ka mbajtur aty. Unë nuk jam një person apo individ që përfaqësoj një parti politike.

E kam filluar këtë eksperiencë krejtësisht natyrshëm, pa i kërkuar askujt një vend pune dhe jam mundur patjetër të meritoj pozicionin që kam nëpërmjet punës, përkushtimit dhe ndaj për një kohë u shkëputa që të justifikoj besimin e njerëzve. Kam një punë me përgjegjësi dhe nuk mund ta anashkaloj”, u shpreh ajo në “Wake Up”.

Rosela Gjylbegu është ngjitur në skenë që në moshën 15-vjeçare. Talenti i saj u spikat në spektaklin “Ethet e së premtes mbrëma”, ku me vlerat dhe vokalin që e karakterizon, fitoi simpatinë e publikut. Ndër vite ka marrë pjesë në festivale të ndryshme, duke u shpërblyer me çmime.