Kryeministri në detyrë i Kosovës Albin Kurti është kërcënuar me jetë.
Në Facebook, një person me llogarinë, Daniel Arianitti, ka shkruar se jep një shpërblim prej 10 milion eurosh në këmbim “të kokës së Albinit”, të cilin e ka krahasuar me ish-liderin e Kubës, Fidel Castro.
“10 milionë euro kush ma sjell kokën e Albinit, Fidel Castros, psikopatit shqiptar”, ka shkruar ai.
Raportohet se Lëvizja Vetëvendosje e ka denoncuar në polici kërcënimin.
Zëdhënësi i LVV-së, Arlind Manxhuka, ka pohuar se aktualisht çështja është në duart e organeve të rendit, shkruan “opinion”.
Po ashtu, në një shkrim në Facebook, Manxhuka u bëri thirrje aktivistëve të LVV-së të mos merren privatisht me kërcënuesin: “E di që shumë prej jush e keni marrë me shumë seriozitet një kërcënim të një personi që kishte bërë ndaj Albinit në FB, por nuk është zgjidhje që privatisht e personalisht të merreni me të, madje s’do të duhej”.
