Të gjithë zyrtarët e lartë që janë përfshirë në afera korrupsioni do të përballen me drejtësinë gjatë vitit 2019 dhe 2020. Prej disa kohësh ndërkombëtarët kërkojnë luftë antikorrupsion në nivele të larta dhe për këtë punë u miratua dhe reforma në drejtësi dhe po pritet ngritja e Strukturës së Posaçme Antikorrupsion. Ky organi i ri që do të ndëshkojë pushtetarët e korruptuar do të jetë gati brenda këtij viti dhe për këtë arsye qeveria ka intensifikuar lëvizjet që po gjatë 2019 të ndihen goditjet e para ndaj korrupsionit në nivel zyrtarësh. Në strategjinë ndërsektoriale të hartuar nga Ministria e Drejtësisë, pasi është kryer monitorimi për periudhën janar-dhjetor 2018, qeveria ka vendosur të fusë disa shtojca.
Këto shtesa kërkojnë që të ketë rritje të goditjes së korrupsionit në nivel të lartë. “Objektivat për t’u arritur në 2019 dhe 2020 janë: rritja me 5% krahasuar me vitin paraardhës e numrit të çështjeve dhe të pandehurve të dërguar në gjykatë. Hetimet, të zbatuara nga agjencitë e zbatimit të ligjit nën koordinimin dhe udhëheqjen e prokurorisë, do të çojnë në përgatitjen e akuzës nga prokuroria dhe paraqitjen e tyre në gjykatë. Rritja e efektivitetit të hetimeve pritet, ndër të tjera, të rritë numrin e akuzave. Një vlerësim i plotë do të marrë në konsideratë rastet dhe personat. Performanca do të vlerësohet duke matur rritjen e numrit të përgjithshëm të akuzave për korrupsion. Treguesi do të matet si nga numri i rasteve dhe numri i personave të përfshirë në akuza. Një nën-tregues shtesë përfshihet për të vlerësuar performancën në kontekstin e veçantë të të ashtuquajturave “raste të korrupsionit në nivel të lartë”. Në këtë kuadër, “rastet e nivelit të lartë” përcaktohen si ato që lidhen me nenet 245 dhe 260 të Kodit Penal”, thuhet në dokumentin e siguruar nga gazeta.
Në rrezik pasuria e pushtetarëve
Qeveria është angazhuar po ashtu që gjatë këtij vjeçari, me ngritjen e SPAK, përveç dërgimit para drejtësisë të njerëzve të korruptuar, të ketë edhe sekuestrime të pasurive të tyre. Sipas dokumentit, gjatë 2019 dhe 2020 pritet të rritet numri i kërkesave për konfiskim, veçanërisht për pasurinë e zyrtarëve të lartë. “Në vitin 2019 mekanizmi i raportimit ë kërkesave për sekuestrim të jetë funksional dhe të dhënat të raportohen. Në vitin 2020 të arrihet rritja e kërkesave për sekuestrim me 5% krahasuar me vitin 2019. Rritja e efektivitetit të hetimeve (të cilat ndër të tjera mund të përfshijnë hetime më të mira financiare dhe procedura të gjetjet së aseteve), pritet ndër të tjera, të rritet numri i kërkesave për sekuestrim të paraqitura nga prokuroria në gjykatë. Mekanizmi përcjellës për statistikat e harmonizuara për korrupsionin dhe krimin e organizuar do të përditësohet për të gjeneruar këto të dhëna dhe të përfshijë shifrën në të gjitha raportet gjashtëmujore. Treguesit do të matet si nga numri i rasteve dhe numri i personave të përfshirë në akuza. Një nën-tregues shtesë do të përfshihet që nga viti 2020 për të vlerësuar performancë në kontekstin e veçantë të të ashtuquajturve “raste të korrupsionit5 në nivel të lartë”. Në këtë kuadër, “rastet e nivelit të lartë” përcaktohen si ato që lidhen me nenet 245 dhe 260 të Kodit Penal”, përcaktohet në dokument.
Dënime 1-14 vjet
Nëse i referohemi Kodit Penal për veprat e përmendura më sipër, duhet theksuar se pushtetarët e korruptuar rrezikojnë nga 1 deri në 14 vjet burg. Sipas nenit 260, të përfshirët në korrupsion pasiv dënohen me burgim nga katër deri në 12 vjet. Ndërsa neni 245 përcakton dënimin për zyrtarët e përfshirë në korrupsion aktiv. Ata dënohen me burg nga një deri në pesë vjet. /Gazeta SOT
