Mes një krize energjie në rritje në Evropë, Zvicra po planifikon të “godasë” qytetarët që nuk respektojnë rregullat e reja të zbatuara për të rregulluar përdorimin e gazit këtë dimër. Personat që shkelin rregullat e reja mund të përballen me gjoba apo edhe burgim deri në tre vjet, sipas një raporti nga e përditshmja zvicerane “Blick”.
Sipas rregullave të reja të Zvicrës, temperaturat në ndërtesat me sistem ngrohje me gaz mund të rriten në maksimum 19 gradë Celsius dhe uji mund të ngrohet deri në 60 gradë Celsius. Ngrohësit rrezatues janë të ndaluar, ndërsa saunat dhe pishinat duhet të qëndrojnë të ftohta.
Këto janë pjesë e masave të përcaktuara në Ligjin Federal për Furnizimin Ekonomik Kombëtar, të cilit Departamenti Federal i Çështjeve Ekonomike (EAER) i referohet shprehimisht në një dokument zyrtar, thuhet në raport.
Markus Sporndli, një zëdhënës i Departamentit Federal të Financave, tha për “Blick” se norma ditore për gjobat mund të jetë së paku 30 franga zvicerane (30 dollarë) dhe maksimumi 3.000 franga zvicerane.
Kompanitë e shërbimeve publike gjithashtu mund të penalizohen nëse tejkalojnë qëllimisht kuotat e tyre të gazit.
Raporti thoshte se qeveria po lëvizte në një “zonë gri”, me sfida dhe mosmarrëveshje mbi masat ndëshkuese që mund t’i mbanin gjykatat të zëna. Kantonet ose shtetet individuale tani përballen me një sfidë të madhe dhe kanë kohë deri më 22 shtator për të paraqitur shqetësimet ose propozimet e tyre.
Fredy Fassler, një oficer i lartë i policisë, i ka kërkuar qeverisë që “të urdhërojë vetëm masa që mund të zbatohen dhe, mbi të gjitha, të kontrollohen”, thuhet në raport.
Fassler tha se ai nuk dëshiron që policia të shkojë nga dera në derë, duke kërkuar që udhëzimet të zbatohen me një ndjenjë proporcioni. Ai përmendi përvojat nga pandemia COVID-19, duke thënë se kishte pasur një “kulturë të caktuar denoncimi” gjatë asaj krize, shtoi raporti.
Do të ishte e këshillueshme të diskutohej nëse në vend të procedimeve penale të kushtueshme, gjobat e thjeshta administrative mund të ishin një zgjidhje më e mirë, tha zyrtari.
Burimi i lajmit: aa.com.tr. Përshtatur nga Tirana Today
