Vjen edhe reagimi i Ministres së Arsimit, Besa Shahini pas djegies së ambienteve të shkollave në Shkodër nga mbështetës së PD. Në një postim në Facebook, Shahini shprehet se dita e fundit e mësimit duhet të ishte një ditë e gëzueshme për nxënësit, por që për shkak të djegies së këtij institucioni, dita e fundit e mësimit do shtyhej.
Ministrja u drejtohet partive opozitare, si parti të pashpresa që nga dëshpërimi dhunojnë gjithçka u del përpara, duke u bërë thirrje se “me dhunë nuk merret pushteti”.
Postimi i plotë:
Dita e fundit e mësimit është ditë e gëzueshme për nxënësit, të cilët kanë mbyllur mësimet, përshëndeten me shoqet e shokët dhe fillojnë pushimet.
Por dhuna e ushtruar nga PD dje në shkollat e Shkodrës dhe paralajmërimi për të tjera shkolla sot, na bëri të shtyjmë këtë ditë të dashur për nxënësit në këto shkolla!
Më vjen keq që partitë e pashpresa, në sajë të dëshpërimit të tyre elektoral, po dhunojnë gjithçka që u del përpara! Por me dhunë nuk merret pushteti dhe këtë fakt shpresoj ta kuptojnë sa më parë!
