Sanitarja e spitalit “Shefqet Ndroqi”, Tire Alldervishi, e cila u arrestua pasi mori ryshfet nga vajza e një pacienteje me koronavirus, tashmë është liruar nga burgu. Ndaj saj është caktuar masa “arrest shtëpie”.
Sanitarja u shtir si infermiere dhe zhvati tetë milionë lekë nga vajza e një zonje të infektuar nga Covid-19, e cila më pas ndërroi jetë. Në kohën kur Tirja u prangos, ajo pretendoi se ishte e infektuar me Covid, madje në dëshminë e dhënë është shprehur se nuk i prishte punë njeriu nëse do lirohej.
Zhvatja kryer nga ana e sanitares, u denoncua në emisionin “Stop” nga vetë vajza e së ndjerës, e cila nuk e fitoi dot betejën me Covid-19.
Pak muaj më parë, Gjykata e Apelit liroi nga qelia infermieren e spitalit “Shefqet Ndroqi”, Sidorela Çela dhe sanitaren Rukije Hoxha, të cilat akuzoheshin se kanë bashkëpunuar me sanitaren Tire Alldervishi në skandalin që përfshiu spitalin Covid 2.
