Presidenti i Kosovës, Hashim Thaçi ka treguar se çfarë u diskutua në darkën e zhvilluar me përfaqësuesen e BE-së, Frederica Mogherini.
Thaçi u shpreh se udhëheqësit e Ballkanit Perëndimor ranë në një mendje sa i përket mosangazhimit konkret të Bashkimit Evropian për shtetet e rajonit.
“Gjatë javës që lamë pas zhvilluam një darkë pune në Bruksel me znj. Mogherini. Të gjithë liderët e Ballkanit Perëndimor treguan përvojat e punës, sfidat dhe ballafaqimet për të ardhmen evropiane të vendeve tona. Ishte konkludim i përbashkët i liderëve të Ballkanit Perëndimor dhe një zhgënjim masiv i shprehur për mosangazhimin konkret të Bashkimit Evropian për shtetet e rajonit tonë”, deklaroi Thaçi.
Ky zhgënjim, sipas Thaçit, transmetohet edhe në Kosovë, kryesisht me jo liberalizimin e vizave, ndërsa shton se shkak është mungesa e unitetit evropian.
“Prandaj, BE-ja dhe liderët e saj, në këtë kohë të mungesës së vizionit të tyre duhet të dëshmojnë se nuk do t’i bëjnë gabimet e liderëve të fillimviteve të 90-ta të BE-së, në kohën e fillimit të krizës jugosllave. Sepse, gjithmonë në Ballkanin Perëndimor ka potenciale të rrezikshme për paqen, sigurinë dhe stabilitetin”, tha presidenti i Kosovës.
